“Фокулариа”-н Семинар

Манай сүмийн итгэгч нарт зориулан “Фокулариа” байгууллагын Солонгос ахан дүүс маань семинар зохион байгуулсан билээ. Энэхүү семинарт тэд монгол хэл дээр бэлтгэсэн дуугаа дуулсан бөгөөд итгэлийн амьдралаа хуваалцан, өөрсдийн хувийн амьдралаас гэрчлэл хийж бидний санаа бодлыг сонсож, асуусан асуултанд хариу өгч байлаа. “Фокулариа” бол энгийн итгэгч нарын байгууллага бөгөөд итгэл бишрэлийн хүчээр Тэнгэрбурханы үгийг өөрсдийн амьдралдаа хэрэгжүүлэх замаар сайн мэдээг дамжуулдаг билээ. Энэ удаагийн семинарт гэр бүлийн гурван хос хүрэлцэн ирж манай бүх паришийн ахан дүүс нарт сайн мэдээ хүргэсэн юм. Эдгээр хосууд өөрсдийн гэр бүлдээ Тэнгэрбурханыг хүлээн авснаар ямар их өөрчлөлт, баяр жаргалыг хүлээн авсан тухай ярьж байлаа. Мөн тэдний амьдралд Тэнгэрбурханы үг ямар холбоотой байдаг, Түүний үгийг хэрхэн баяртайгаар дагадаг талаар сонссон юм. Тэд энэ бүх итгэлийн амьдрал, баяр жаргалыг зөвхөн өөрсдөө бус гэр бүлийн гишүүдтэйгээ хуваалцаж, аливаа саад бэрхшээлийг Тэнгэрбурханы хайр энэрлээр даван туулж байгааг сонсоод бид ч бас баяртай байлаа. Ялангуяа эхнэр нөхөр нэг сэтгэлээр Тэнгэрбурханы үгийг даган зөвт байдлаар амьдрахад ямар их хичээл зүтгэл, хөдөлмөр шингэж байж гэр бүлийн бүх гишүүдэд аз жаргалтай болох нь тэдний ярианаас ойлгогдож байлаа. Цаашлаад тэд зөвхөн өөрсдийн гэр бүл төдийгүй бусад гэр бүлийн хосуудад ч сайн дураар туслан сайн мэдээ хүргэснээр олон хүмүүсийн амьдралд баяр хөөрийг бэлэглэж байгаа юм. Энэ бүх баярт мэдээг бидэнтэй хуваалцсан бүх Фокуларичууд ялангуяа бидэнд өөрсдийн гэрчлэлээр сайн мэдээ хүргэсэн хосууддаа бүх итгэгчдийн өмнөөс талархал илэрхийлж байна.        

     

Семинар

Манай католик шашны сургалтын албанаас зохион байгуулсан Катехист буюу Католик Шашны сургалтын багш нарын семинар 8.16 – 8.18 хооронд болж өнгөрсөн билээ. Энэхүү семинарт манай бүх паришийн багш нар оролцсон ба эхний өдөр бүлгээр хөгжөөнт тоглоом тоглон, хоорондоо танилцаж хамтдаа ярилцсан билээ. Дараах өдөр нь Монгол дахь Католик шашны тэргүүн Хамба лам Венсэслао Падилла хүрэлцэн ирж Катехист хүний мөн чанар юу болох, амьдрал дээр хэрэгжүүлэх талаар тайлбарлан, хөршөө өөрийн адил  хайрлаж буйг жишээ болгон бахархан ярьж өгснөөр бидэнд урам зориг хайрласан бөгөөд түүнээс адислал хүлээн авсандаа бид баяртай байлаа. Мөн энэ өдөр Роза болон Аманда эгч маань өөрсдийн гэрчлэлээ хуваалцаж, фр.Франциско анхны Катехистуудын талаар сонирхолтой хичээл заан, Катехист гэж хэн болох, сурган хүмүүжүүлэх үүргийн талаар Клара бидэнд маш чухал мэдээлэл өгсөн юм. Ийнхүү оройн хоолны дараа Ариун Сүнсний төлөө дуулан залбирч, өөрсдийн сүснлэг амьдралын төлөө чөлөөтэй залбирч бүгд баяр жаргалтай болсон байлаа. Эзэний өдрийн Мисаг фр. Андрей хүрэлцэн ирж удирдсан бөгөөд номлолдоо: орчин үеийн Катехист хүний амьдрал, саад бэрхшээлээ хэрхэн даван туулдаг талаар ярисан нь багш нарын сэтгэл хөдлөн олон зүйлийг ухаарч авсан билээ. Энэ бүх үйл ажиллагаанд багш нар их идэвхи санаачлагатай оролцсон бөгөөд цаашид сурч мэдэх зүйлийн талаар хэлж, дараагийн семинарт баяртайгаар оролцохоо илэрхийлж байлаа. Энэхүү семинарыг санаачилж их хувь нэмэр оруулсан мишинерүүд итгэгч нартаа талархаж байна.

Хамба ламын 10 жилийн ойн баярын Миса

Энэ жил манай Монгол дахь Католик шашны тэргүүн Вэнсэслао Падиллагийн Хамба лам болсны 10 жилийн ой тохиож байгаа билээ. Энэ бол бидний хувьд томоохон баярын өдөр бөгөөд Хамба лам Венсэслао Падилла бол Монгол дахь Католик шашны түүхэнд онцгой хувьд нэмэр оруулж буй санваартан билээ. Энэхүү ойг тохиолдуулан баярын Мисанд манай бүх паришийн итгэгч нар Катедральд цуглан хамтдаа залбирч, түүнээс адис хүлээн авсан юм. Ватикан улсаас Монгол дахь Католик шашны тэргүүн Хамба лам Венсэслао Падиллад баяр хүргэн, Мариа Эхийн хөрөг зураг илгээсэн байлаа. Мисаны үеэр Хамба лам маань Монгол эмэгтэйн төрхийг шингээсэн энэхүү Мариа Эхийн хөргийг бидэнд үзүүлж танилцуулан, биднийг сэтгэгдлээ хуваалцахыг хүсэж байсан юм. Магтаал Талархлын Мөргөлийн дараа бүх Паришийн хамт олноос Хамба Ламд зориулан баярын мэндчилгээ дэвшүүлж, залуучууд маань өөрсдийн бэлтгэсэн урлагийн хөтөлбөр үзүүлэн, бэлэг дурсгалын зүйлсээ дурсган хамтдаа баярласан билээ.Бидэнд зориулан амттай зууш бэлтгэн, сайхан орчинд биднийг угтсан Катедралийн хамт олон, бусад мишинерүүдэд баярлалаа. Энэхүү бэлэг дэмбэрэлтэй өдөр хүрэлцэн ирж Тэнгэрбурханы хайр хишгийг хүлээн аван, баярын Мисанд оролцсон бүх паришийн итгэгч нартаа талархал илэрхийлж байна.   

Бясалгал

Манай “Гэгээн Эх Мариа” сүмээс залуу эмэгтэйчүүдэд зориулан бясалгал зохион байгуулсан билээ. Энэхүү арга хэмжээнд  17 – 25 насны эмэгтэйчүүд оролцсон ба “Хайрын Төв”-д хоёр өдөр үргэлжилсэн юм. Католик итгэгч хүний хувьд өөрийн хувийн болоод ирээдүйн амьдралаа итгэлийн нүдээр харах утга учрын талаар ярилцан, тунгаан бодож залбирсан билээ. Удахгүй гэрийн эзэгтэй, ирээдүйн ээж болох эмэгтэйчүүд маань амьдралдаа Тэнгэрбурханы хаанчлалыг оруулснаар зөв зүйтэй сонголт хийж, бие биенээ хүндэтгэдэг, хайрын бодит илэрхийлэл болсон харицлагатай амьдрал зохиохыг хүсэж буйгаа илэрхийлж байсан билээ. Бясалгалын үеэр гэрлэсэн эгч нарынхаа заавар зөвлөгөөг сонсож, хрисчин гэр бүлийн үлгэр жишээгээр амьдрахад тулгарч болох саад бэрхшээлийг зөв зүйтэй даван туулахад өөрийгөө хэрхэн бэлтгэх талаар ярилцаж санал бодлоо солилцсон юм. Мөн хамтдаа Мисанд оролцон, өөрсдийн ирээдүйн амьдралд бэлтгэхийн төлөө залбирч байлаа. Энэ үйл ажиллагааг зохион байгуулсан болон оролцсон итгэгч нартаа талархаж  байна.   

“Христийн төлөө Хосууд”-н Семинар

Манай Католик шашны энгийн итгэгч нарын байгууллага болох “Христийн төлөө Хосууд” хөдөлгөөний ахан дүүс маань Монгол итгэгч нарт зориулан семинар хийхээр Флиппинээс Монголд хүрэлцэн ирсэн юм. “Христийн төлөө Хосууд” байгууллага нь 1981 онд үүсэн байгуулагдсан бөгөөд дэлхийн олон оронд үйл ажиллагаа явуулж байгаа билээ. Семинар хоёр өдөр үргэлжилсэн бөгөөд Монгол дахь Католик шашны тэргүүн хамба лам Венсэслао Падилла хүрэлцэн ирж “Христийн төлөө Хосууд” ахан дүүс нараар дамжуулж бидэнд сайн мэдээг хүргэж байгаа Тэнгэрбурхандаа талархаад, тэдэнд баярлаж буйгаа илэрхийлсэн билээ. Эхний өдөр гурван хос маань өөрсдийн гэр бүлийн амьдралын талаар хуваалцан гэрчлэл хийн, хоёр дахь өдөр нь Хрисчин хосуудын онцлог, ёс суртахуун болон үүрэг хариуцлагын талаар ярьж, бидэнтэй санал бодлоо хуваалцсан билээ. Энэ бол Есүс Христийг өөрсдийн амьдралын төв болгосноор хайр энэрэл баяр хөөрөөр дүүрэн, бат бэх гэр бүлтэй болж, Тэнгэрбурханы хаанчлалд өөрийн хайртай хүмүүстэйгээ хамт байх явдал юм. Үүгээр ч зогсохгүй бусад хүмүүстэй энэхүү баяр жаргалаа хуваалцах нь Хрисчин хүмүүсийн үүрэг билээ. Энэ бүхнийг хуваалцан Тэнгэрбурханы сайн мэдээг бидэнд хүргэсэн “Христийн төлөө Хосууд” хөдөлгөөний ахан дүүс нартаа маш их баярлаж байна. Хүн бүр хань ижил, үр хүүхдээ хүндэтгэн Христийн жишээгээр амьдарч, хамт олноороо бие биенийхээ зөвт амьдралд нь туслаж дэмжих нь өнөөгийн нийгэмд үнэ цэнэтэй болж байна. Манай “Гэгээн Эх Мариа” сүм дээр хүрэлцэн ирж, семинарт идэвхитэй оролцсон итгэгч нартаа баярлалаа.  

ЯАРМАГ ХУДАЛДАА

Манай “Гэгээн Эх Мариа” сүм дээр 7 сарын 28 нд нийгмийн ажилд зориулсан “Яармаг Худалдаа” зохион байгуулсан билээ. Нийгмийн ажил бол Хрисчин хүний хувьд өөрийн итгэл бишрэл, Тэнгэрбурханы хайр энэрлийн бодит амьдрал дахь илэрхийлэл, амьдралын утга учир хэмээн ихэд чухалчилж авч үздэг  билээ. Тиймээс зовж шаналсан, тусламж эрж буй хүмүүст чадлын хэрээр тусалж, тэдэнд итгэл болон урам зориг хайрладаг юм. Энэ үйл ажиллагаанд манай итгэгчид өөрсдийн сайн дураар оролцож, оюун санаа ба эд материалын тусламж үзүүлж ирсэн билээ. Энэ удаагийн яармаг худалдаанд итгэгчид хувцас болон хоол хийж оролцсон бөгөөд ялангуяа манай Солонгос итгэгчид чанартай сайн хувцас хунар цуглуулан, бас амттай хоол хийж оролцсон нь олон хүнийг баярлуулж, манай нийгмийн ажлын албанд чухал хувь нэмэр оруулсан юм. Энэхүү үйл ажиллагаанд идэвхитэй оролцож өөрийн хувь нэмрээ оруулан Тэнгэрбурханы хайр хишгийг хүлээн авсан бүх хүмүүст талархал илэрхийлж байна.  

         

Дэлхийн Залуучуудын Өдөр өндөрлөв

Манай Католик шашнаас уламжлал болон зохиогддог “Дэлхийн Залуучуудын Өдөр” 2013 онд Бразил улсын Рио хотноо болсон билээ. Энэхүү үйл ажиллагаа 7.23 ~ 7.28 хүртэл үргэлжилсэн бөгөөд Пап лам Францис болон Хамба лам нар, мишинерүүд, дэлхийн өнцөг булан бүрээс ирсэн гурван сая мөргөлчид хүрэлцэн ирсэн байлаа. Энэ бүх хүмүүс Есүс Христийн нэрээр цуглан дэлхийн амар тайван байдлын төлөө хамтдаа залбирч өөрсдийн дуу хоолойгоо өргөж байсан юм. Энэ үйл ажиллагаанд манай Монгол Католик залуус ч мөн адил оролцож өөрсдийн дуу хоолойгоо өргөн, Есүс Христийн зааж буй тэнгэрлэг хайр, баяр жаргалын замд бусдыг уриалан дуудахад хувь нэмрээ оруулсанд бид бүхэн талархаж байгаа билээ. Пап лам Францис хаалтын Мисанд хийсэн номлолдоо: Хайрт Залуу Найзууд минь, “Явж бүх  үндэстнийг дагалдагч болгогтун ”. Есүс энэхүү үгээ бидний хүн нэг бүрт хандан хэлжээ: “Дэлхийн өнцөг булан бүрээс ирсэн залуустай итгэлээрээ хамт байж амьдарч, Дэлхийн Залуучуудын Өдөрт оролцоход гайхамшигтай байлаа. Гэвч бид одоо явах ёстой, одоо та бүхэн энэхүү туршлагаа бусдад дамжуулаарай.” Есүс та бүхнийг сайн мэдээ түгээх шавиа болгохоор дуудаж байна!  Өнөөдөр бидний сонссон Тэнгэрбурханы үгийн гэрлээр Тэнгэрлэг Эзэн бидэнд юу хэлж байна вэ? Гурван энгийн санаа: Явагтун, бүү ай, бас үйлчлэгтүн." хэмээн энэ үгсийг дэлгэрэнгүй тайлбарласан билээ. Энэ үйл ажиллагааг чих тавин дэлхийн улс орон бүрт хүмүүс сэтгэл догдлон хүлээн авч, сэтгэл зүрхээрээ хамт байж сайн мэдээг баяртай хүлээн авч байна.