Зуны Сургалт

 

Жил бүр манай Католик шашны сургалтын багш нарт зориулан зуны сургалт зохион байгуулдаг уламжлалтай билээ. Зуны сургалт 7.3~7.5ны хооронд үргэлжилсэн бөгөөд нийт бүх паришийн 24 багш нар оролцсон бөгөөд манай “Гэгээн Мариа Сүм”-ээс 5 багш оролцсон юм. Багш нар маань онцгой жил болох “Энэрэл нигүүслийн жил”-д зориулсан Пап лам Францисын захидалтай танилцаж, хоорондоо ойлгож ухаарсан зүйлсээ хуваалцан, өөрийн сэтгэгдлээ илэрхийлсэн билээ. Ингэснээр өөрсдийн амьдралд энэрэл нигүүслийг хэрэгжүүлж, бусаддаа зааж сургахыг хүсэж буй талаар санал бодлоо хуваалцаж байлаа. Мөн энэхүү сургалтаар уламжлан кшс-ын багш нар маань хамтдаа залбирч, хамтдаа Миса өргөж өөрсдийн итгэл бишрэл болон сүнслэг амьдралаа гүнзгийрүүлэн хөгжүүлэхээс гадна, сургалтын арга барил болон багаар ажиллах талаар сурч авсан билээ. Зуны сургалт үзэсгэлэнт Хандгайтад зохион байгуулсан нь хүн бүр баяртай байсан бөгөөд Хамба лам Венсэслао Падилла болон бусад паришийн лам нар хүрэлцэн ирж өөрсдийн сургаал номлол, чин сэтгэлээ үгээ илэрхийлж байсан нь КШСБагш нарт маш их урам зориг хайрласан билээ. Зуны сургалтанд хүрэлцэн ирж идэвхитэй оролцсон бүх багш нартаа болон зохион байгуулхад оролцсон бүх хүмүүст талархаж байна.

Багш нарын сургалт хичээл

Энэ сарын 12нд манай паришийн сургалтын багш нарт зориулан өөрсдийн сургалтын арга барил болоод мэдлэгээ дээшлүүлэх сургалт зохион явуулсан билээ. Сургалт 2 - 6 цаг хүртэл үргэлжилж, нийт 14 багш оролцсон юм. Хичээлийн сэдэв маань "Ариун Сүнс"-ний тухай байсан бөгөөд энэхүү хичээлийг урьдчилсан сургалтын багш нар бэлтгэн явуулсан юм. Энэ өдөр бид нар хамтдаа тоглож, хичээлээ сурч, дуу дуулж, залбирч бас багш нарынхаа бэлтгэсэн цайг ууснаар хичээл өндөрлөсөн юм. Үүний дараа дүгнэлт хичээл явагдаж хичээлээс асуух зүйл болоод сэтгэгдлээ хамтдаа хуваалцсан билээ. Багш нар хичээлийн талаар ихэд өндөр сэтгэгдэлтэй буйгаа илэрхийлсэн бөгөөд цаашид олон зүйл сурч бусаддаа зааж өгөхийг уриалсан юм. Энэ өдөр сургалт зохион байгуулсан бүх багш нартаа болон идэвхитэй оролцсон багш нартаа талархаж байгааг илэрхийлж байна. 

"Би Дурлачихжээ" сургалт хөтөлбөр

Манай "Гэгээн Мариа Сүм"-ийн хүүхдүүд 8 сарын 2нд "Би Дурлачихжээ" гэсэн хөтөлбөрт амжилттай оролцож олон зүйлийг суралцсан билээ. Энэ бол өсвөр насны хүүхдүүдэд зориулсан чөлөөт сургалтын эхний хөтөлбөр бөгөөд тэдэнд тулгардаг олон асуудлууд, өөрсдийн гэр бүл, найз нөхөд болоод нийгэм дэх харилцаагаа сайжруулах болон хайрын үнэ цэнэ ба мэдрэмжээ хэрхэн удирдах гээд маш олон мэдээллийг хамарч чадсан юм. Хөтөлбөр "Гэгээн Перт ба Гэгээн Паул" сүмд зохиогдож, бүх паришийн 30 гаруй хүүхэд залуус оролцсон байна. Энэхүү хөтөлбөрт  "Гэр бүл, Хувь хүн Хөгжлийн Үндэсний Төв" ТББ-н ажилтан Сүхбаатар хүрэлцэн ирж  10-12 цаг хүртэл семинар хийн, хүүхдүүдийн асуусан асуултанд чөлөөтэй хариулт өгч байв. Үдээс хойших хөтөлбөрт хүүхэд залуус маань хамтдаа хөгжөөнт дуу бүжиг хийж, хайрын үнэ цэнэ болон бодит амьдрал дээр тулгардаг саад бэрхшээлийг хэрхэн таниж мэдэх талаар "Пасторал багийн" бэлтгэсэн олон талын зөвлөгөөг сонсож авсан юм. Хүүхэд залуус маань энэ хөтөлбөрт оролцсондоо баяртай байсан бөгөөд найз нөхөд, гэр бүлийнхэндээ сурсан мэдснээ хуваалцана гэдэгт итгэж байна. Энэ хөтөлбөрт идэвхитэй оролцсон хүүхэд залуус болон зохион байгуулахад оролцсон хүмүүст талархаж байна.