Ариун Гэр Бүлийн Баяр

Жил бүр манай Католик шашны итгэгчид маань “Гэгээн Петр ба Паул” катедралд бүх паришаар цуглаад хамтдаа Ариун Гэр Бүлийн Баяраа тэмдэглэдэг уламжлалтай билээ. 12.29нд болсон баярын Мисаг Монгол дахь Католик шашны тэргүүн, хамба лам Венсэслао Падилла удирдсан бөгөөд энэ үеэр ирэх дөрвөн жилийн Пасторал төлөвлөгөөг бүх байгууллагат гардуулж өгсөн онцгой үйл явдал болсон билээ. Хамба лам Венсэслао Падилла номлолдоо: сүсэгтэн олондоо хандаж Христийн мэндэлсэн баярын мэнд хүргээд Ариун гэр бүлийн үлгэр жишээгээр амьдрахыг уриалсан юм. Хэдийгээр Иосэф Мариа нарын гэр бүлд бэрхшээл тохиолдож гэр орон, ах дүүсээ орхин хол газар явсан ч хамтдаа ойр дотно байж, гэр бүл үр хүүхдээ хамгаалж байсан билээ. Бидэнд ч бас гэр бүл, хань ижлээсээ хол амьдрах явдал тохиолддог бөгөөд тэр бүрт ямар хэцүү, хүнд байдгийг ойлгох бизээ. Ийм үед Ариун Гэр Бүлийн жишгээр хоорондоо ойр дотно байж, аав ээж нар бие биенээ хүндлэн үлгэр дуурайл үзүүлэн, үр хүүхдээ хайрлаж тэдний зүрх сэтгэлийг бүү шархлуулаарай. Харин үр хүүхдүүд нь эцэг эхийнхээ үгэнд дуулгавартай байж, эцэг эхээ хүндлээрэй. Үр хүүхдийнхээ боловсрол ба хүмүүжилд нь анхаарч чадах чинээгээр туслан, сайн иргэн хүн болгоход тэдний хэрэгтэй бүхнээр туслаарай. Мэдээж гэр бүлийн асуудлаас болж олон гэр бүлүүд салахад хүрдэг. Харин ийм аргаар асуудлыг шийдэх бус гэр бүлийн боловсролыг хөгжүүлэн, хүн бүр сурч хөгжин, хичээн амьдрах хэрэгтэй. Ингэснээр сайн үр жимс ургуулагч модны бат бэх үндэстэй адил байх болно. Хүүхдийн хөгжил ба гэр бүлийн боловсролын талаар Монголд ихээхэн анхаарч олон арга хэмжээ зохион явуулж байна. Манай Католик шашны ирэх дөрвөн жилийн пасторал төлөвлөгөөнд боловсролын талаар ялангуяа гэр бүлтэй холбоотой олон арга хэмжээ орсон байгаа билээ. Та бүхнийг эдгээр үйл ажиллагаанд идэвхитэй оролцохыг урьж байна. Ариун Гэр Бүлийн амар тайван болон баяр баяслыг хүсэн ерөөж байна.   

ХРИСТИЙН МЭНДЭЛСЭН БАЯР

Манай Католик шашны сүсэгтнүүд Христмас буюу Христийн мэндэлсэн баярыг өргөн дэлгэр тэмдэглэн өнгөрүүлдэг билээ. Энэ жил манай "Гэгээн Мариа Сүм"д 12.24нд 20 цаг, 12.25нд 19 цагт тус тус баярын Миса өргөсөн юм.  Мисаг паришийн ахлах лам фр.Франциско ба фр. Эрнесто, фр. Чарлиз нар удирдсан бөгөөд бүх бүлгэмийн итгэгч нар хүрэлцэн ирсэн байлаа. Мөн Мисаны үеэр залуучууд маань Христмас баярт зориулан өөрсдийн бэлтгэсэн жүжгээ сонирхуулж, бас Солонгос ахан дүүс маань дуу дуулан баяр дээр баяр нэмж байв. Энэ баяр бол Тэнгэрбурхан өөрийн Хүүгээ бидний аврагч болгон хайрласан агуу хайрын баяр юм. Тийм учраас Христийн мэндэлсэн баярын өдрөөр хүн бүр зүрх сэтгэлээ энэрэл хайраар дүүргэн, энэхүү хайраа гэр бүл, найз нөхөд, бусад хөрштэйгөө хуваалцдаг билээ. Мөн Христмас баяраа угтан манай сүмийнхэн буяны ажил, айлуудаар "Ариун Гэр Бүл" аялуулах, наминчлалын ёслол, багш нар болон "Хайрын Сургууль"н Христмас баяр гээд олон үйл ажиллагаа зохион явуулсан юм. Энэ бүх үйл ажиллагаанд идэвхитэй оролцсон сүсэгтэн олондоо талархаад та бүхэнд Христмас баярын мэнд дэвшүүлж байна.     

Сайн Үйлс

Жил бүр манай “Гэгээн Эх Мариа” сүмээс хүйтний улирал ирж байгаатай холбогдуулан нэн ядуу айлд нүүрс тараах буяны ажил зохион байгуулдаг билээ. 12.10нд болсон энэ бүх ажилд сүмийн ажилчид идэвхитэй оролцож, нүүрс савлах ба хүргэж өгөх ажлыг гүйцэтгэсэн юм. Энэ бол угтлага улирал буюу Христосын ирэлийг угтан өөрсдийгөө бэлтгэж, Тэнгэрбурханы хайр ивээлийг түгээж буй томоохон үйл хэрэг болсон юм. Энэ удаа ажилчид 5 тн нүүрсийг савлан тэдгээр айл тус бүрт 5 шуудай буюу 250 кг нүүрс хүргэж өгсөн юм. Хүйтний эрч чангарч байгаа энэ үед хөгшин настан болон бяцхан хүүхдүүдээ дулаан хонуулах болсондоо тэд баяртай байлаа. Ялангуяа нэн ядуу амьдралтай, олон хүүхэдтэй айлууд хог түүж дулаацан өдөр хоногийг өнгөрөөж байгааг олонтаа харсан билээ. Тэдгээр айл өрхүүдэд сэтгэлийн дэм, итгэл найдвар, баяр баяслыг төрүүлсэндээ бид ч бас сэтгэл хангалуун байсан юм.

Угтлага улирлын үйл явдал

 Угтлага улирал бол хүн бүрт ариусал ба халуун дулаан баяр хөөр, ухамсарт өөрчлөлтийн ивээл хишгийг хайрладаг онцгой мөч билээ. Учир нь угтлага улирлаар дамжуулан Тэнгэрбурханы хайр энэрлийн үнэ цэнийг мэдэрч, тэнгэрлэг баяр жаргалыг хуваалцах боломжтой байдаг. Манай “Гэгээн Мариа Сүм”ээс угтлага улирлаа угтан сүсэгтэн олондоо зориулан Ариун Гэр Бүлийн баримлыг гэрт нь зочлуулах боломжийг олгож байгаа юм. Тиймээс гэр бүлүүд маань Ариун Гэр Бүлийн баримлыг гэртээ баяртайгаар хүлээн авч, хамтдаа залбирч ариун гэр бүлийн жишгээр амьдран Аврагч Эзэнийг хүлээн авахад бэлтгэж байгаа билээ. Мөн дотны хүмүүс болон ойр амьдардаг бусад сүсэгтэн ахан дүүс нараа урин, бие биедээ тусалж энэхүү баяр баяслаа хуваалцахыг хүсэж байна. Ариун гэр бүлийн баримал маань өдөр бүрийн Мисаны дараа нэг айлд айлчилж дараах өдрийн Миса хүртэл гэрт нь хамт байх юм. Христосын ирэлтийн улирлыг угтаж байгаа эдгээр гэр бүлүүд болон бусад бүх ахан дүүс нартаа талархаж байна. Мөн энэ үйл ажиллагаанд хамрагдаж амжаагүй хүмүүс ч бас зүрх сэтгэлээрээ өөрсдийн гэр бүлдээ ийнхүү Ариун Гэр Бүлийн хамт байхыг хүсэж байна.     

БЯСАЛГАЛ

  Уламжлал ёсоор сарын сүүл буюу 11.24нд манай “Гэгээн Эх Мариа Сүм” бясалгал зохион байгуулсан билээ. Энэхүү бясалгал маань Христийн мэндэлсэн баярын бэлтгэл буюу Угтлага Улиралд зориулсан юм. Угтлага улирал 11.30аас 12.24 буюу  Эзэний мэндэлсэн өдөр хүртэл үргэлжилдэг билээ. Бясалгал угтлага улирлын тайлбар, бүлгээр хуваалцах, бясалгах цаг ба наминчлалын ёслол гэсэн хэсгээс бүрдсэн бөгөөд 50 орчим сүсэгтэн оролцсон байна. Итгэгчид маань Эзэний мэндлэлтээр дамжуулан хүлээн авч буй хайр хишиг болон авралын замаар амар тайван, шударга байдлын Хаант улсад ороход өөрсдийгөө хэрхэн бэлтгэх талаар олон зүйл сурч. Хамтдаа бясалган хэрхэн тунгаан бодож, гэмшил, найдвартайгаар Угтлага улирлаа тэмдэглэх тухай мэдлэгтэй болсон юм. Бясалгалдаа идэвхитэй оролцсон бүх сүсэгтэн нартаа болон бэлтгэхэд тусласан бүх багш нарт талархаж байна.         

Хамба Ламын Номлол

Манай Монгол дахь Католик шашны тэргүүн, хамба лам эрхэм хүндэт Венсэслао Падилла “Гэгээн Эх Мариа” паришд хүрэлцэн ирж Миса удирдсан билээ. Хамба лам номлолдоо: “Энэ өдрийн уншлагыг дурдаад, дэлхийн төгсгөл ойрхон байгаа тухай хүчирхэг болоод аюулын тухай сонсоод хэн бүхэнд айдас төрдөг билээ. Өнгөрсөн долоо хоногт “Гэгээн Эх Мариа” паришийн итгэгч Элизабет талийгаач болсонд чин сэтгэлээсээ эмгэнэл илэрхийлж байна. Мөн саяхан Флиппин улсад болсон супер далайн шуурганд 10 мянга орчим хүмүүс нас барсан бөгөөд амьд үлдсэндээ олон хүмүүс талархаж байгаа ч өөрт байгаа бүхнээ алдан маш их айдастай хоцорсон тул цаашид амьдралаа хэрхэн босгож амьдрах вэ? гэсэн асуудал тулгарч байна. Энэхүү байглийн гамшгийн өмнө хөгшин залуу, баян ядуу, хичнээн эрх мэдэлтэй байлаа ч хүн гэдэг ямар хүчин мөхөс болохыг бодитоор харж буй хүмүүс өөрт ирэх тэр цаг мөчийн талаар эрхгүй бодоход хүргэж байна. Маш олон хүмүүс энэ талаар асууж, санаа тавьж, залбирч, сэтгэлийн хандив өргөж байгаад талархаж байна. Хрисчин хүний хувьд бид өөрсдөөсөө тэр цаг үе ирэхэд бэлэн үү? хэмээн асууж байна. Өнөөдрийн уншлага дээр зөнч Малахи хэлэхдээ: “Хэрэв бид Есүст итгэж, зөв шударга сэтгэлтэй байвал Тэнгэрбурханы нар бидэн дээр үргэлж гийж, идгээх болно”. Мөн Есүс “Хэрэв надад итгэж, бие ба цусаар минь нэгдвэл мөнх амийг олох болно” хэмээн хэлсэн билээ. Хэдийгээр бидний эргэн тойронд үхэл зовлон, аймшигтай зүйлс болж байгаа ч өөрсдийн итгэл бишрэлээрээ урам зоригтой амьдарч, бие биенээ хайрлаж туслацгаая. Хамтдаа бидний эгч дүүс болсон Элизабет эгчийг дурсан санаж, залбирцгаая.” Ийнхүү бидэнд урам зориг хайрлаж Тэнгэрбурханы сайн мэдээг түгээж буй хамба лам Венсэслао Падиллад итгэгчдийн өмнөөс талархаж байна.               

          

БЯСАЛГАЛ

Манай "Гэгээн Эх Мариа Сүм"ийн хувьд Тэнгэрбурханы энэрэл хайрын үлгэр жишээ, нүүр царай болоход сүмийн ажилчид гол төлөөлөл болдог билээ. Ажилчид маань сүсэгтэн хүний хувьд ариун амьдралаар амьдрахын төлөө өөрсдийн сүнслэг амьдралдаа анхаарал тавьдаг юм. Энэ удаа ажилчдын сүнслэг амьдралаа хөгжүүлэхэд туслах үүднээс 11.12нд "Антоон Мостарт" төв дээр бясалгал зохион байгуулсан билээ. Энэхүү бясалгал "«Би» -г хайж одох аялал" сэдэвтэй бөгөөд өөрийн өнгөрсөн амьдралаар аялан өөрийгөө олж авах явдал байв. Ингэснээр өөрт хэрэгтэй Ариун Сүнсний бэлгийг Тэнгэрбурханаас хүлээн авч, өдөр тутмын амьдралдаа Есүсийн үлгэр дууриалаар амьдрахыг бодит хэрэг болгох зорилготой байлаа. Бясалгалыг Солонгос улсаас ирээд мишинерийн ажил эрхэлж буй Юстина удирдсан юм. Тэрээр Солонгосд 40 жил дунд сургуулийн багшаар ажиллахаас гадна олон гэр бүл, хосуудын итгэлийн амьдралд зориулан энэхүү бясалгалыг явуулж байсан туршлагатай итгэгч билээ. Ажилчид маань хамтдаа цуглан тус тусын аялалд гарч өөрт тохирсон Ариун Сүнсний бэлэг хүлээн авсандаа сэтгэл хангалуун баяртай байсан юм. Бидэнд туслан бясалгал удирдсан Юстина эгч болон бусад бүх хүмүүст талархаж байна.
                   

Талийгаачдыг Тайтгаруулах Сар

Уламжлал ёсоор манай Католик шашинд 11 сарыг талийгаачдыг тайтгаруулах сар хэмээн тэмдэглэдэг билээ. Энэ нь Тэнгэрбурханы хаанчлалд ороход тусламж хэрэгтэй байгаа насан эцэслэгч нарын төлөө хийж буй ариун үйлс юм. Манай Католик шашны чуулган энэ ариун үйлсийг өөрийн үүргээ хэмээн үзэж, ихэд хариуцлагатай хандаж ирсэн билээ. 11.2нд  буюу "Талийгаачдыг Дурсах" өдөр манай паришийн итгэгч нар болон мишинерүүд хамтдаа насан эцэслэгчдийн газар очин, тэдний төлөө Тэнгэрбурхандаа залбирсан юм. Зөвхөн 11 сар төдийгүй бусад үед ч гэсэн сүсэгтнүүд маань сүмдээ ирж өөрсдийн ойр дотны болон бусад талийгаачдын төлөө залбирч, өглөг өгөх, өршөөл ба гэмшлийн үйлсээр дамжуулан арилгах оронд буй ахан дүүс нартаа туслах боломжтой байдаг юм. Нийт сүсэгтэн та бүхнийг талийгаачдыг тайтгаруулах буянтай үйлсэд идэвхитэй оролцохыг урьж байна.     

ГЭР БҮЛИЙН АМЬДРАЛ

Католик гэрлэлт бол зүгээр нэг гоёмсог ёслол биш, учир нь ариун ёслолоор дамжуулан хосууд маань дэлхийд өөрсдийн үүрэг даалгавраа биелүүлэхэд хэрэгтэй ивээлээ Тэнгэрбурханаас хүлээн авдаг юм хэмээн Пап лам Францис хэлсэн билээ.

Гэр бүлийн амьдрал дахь Итгэлийн Жилд зориулан Гэгээн Петрийн талбайд хүрэлцэн ирсэн 100,000 орчим хүмүүст хандан Пап лам хэлэхдээ: Католик гэрлэгсэд бол гэнэн биш, тэд хэцүү цаг үе тулгарна гэдгийг мэддэг. Гэхдээ  Католик хосууд маань өвчтэй болон эрүүл үед, баяртай болон гунигтай мөчид, өөрсдийн амьдралын бүхий л өдрүүдэд бие биенээ хайрлаж байхаа тангаргалан, бат бэх байдлын төлөө Тэнгэрбурханд итгэж найдан, өөрсдийн амьдралаа түүний гар дээр тавьдаг билээ.

“Тэд зугтдаггүй, тэд нуугддаггүй; тэд гэр бүлээ төлөвшүүлэх болон хүүхдүүдээ дэлхий ертөнцөд хөл нийлүүлэх үүрэг даалгавраас зайлсхийдэггүй,” хэмээн Пап лам хэлэв.

Гэр бүлийн амьдралын түүхээс хуваалцахаар балчир хүүхдээс өвөө эмээ нар хүртэл Пап лам ба цугласан олонд хандаж үг хэлэхээр уригдсан байлаа. Мөн үүнд Италийн өмнөд арлын оршин суугч, Африкийн цагаачид, Сирээс ирсэн хосууд гээд маш олон хүмүүс байсан юм. 

БЯСАЛГАЛ

Уламжлал ёсоор манай “Гэгээн Эх Мариа” сүм дээр сарын сүүлийн Эзэний өдөр болох 10 сарын 27нд итгэгч нарт зориулсан бясалгал зохион байгуулсан билээ. Энэхүү бясалгал “Ариун Сарнайн Эрхин залбирал” сэдэвтэй байсан бөгөөд гэлэнмаа Шиханна /МС/ удирдан явуулсан юм. Бясалгалын эхэнд Цэвэр Ариун Мариа болон “Ариун Сарнайн Эрхин залбирлын” түүхэн үүсэл ба утга учрын талаар дэлгэрэнгүй тайлбарлаж, хэрхэн залбирах аргыг танилцуулан зааж өгсөн билээ. Үүний дараа итгэгчид маань Мариа Эхийн бидэнд заасны дагуу хамтдаа “Сүр Жавхлант Нууц”ыг бясалган залбирснаар үйл ажиллагаа өндөрлөв. Бясалгал цаг гаруй хугацаанд үргэлжилсэн ба итгэгчид маань идэвхитэй оролцож олон зүйлийн талаар сонсож мэдлэгээ хөгжүүлсэн билээ. Семинарыг бэлтгэн явуулсан систер Шиханна болон хүрэлцэн ирсэн бүх итгэгч нартаа талархаж байна.   

Пап Лам Францисын шашны сургааль

Эрхэм хүндэт Ахан Дүүс нараа:

Сүм дээр үргэлжлэн явж буй католик шашны сургалт маань одоо Ватиканы Хоёрдугаар Дээд хуралдаанаас сануулж буй “Христтэй итгэл бишрэл, хайр энэрлээр бүрэн төгс нэгдэхийн тулд Шашны үлгэр дууриал” болох Цэвэр Ариун Мариаг харж байна. Израйлийн охин гэгддэг Мариа Тэнгэрбурханы дуудлагад хариу өгөн, Хүүгийнх нь Эх болсон билээ. Мариа өөрийн Тэнгэрбурханы таалалд дуулгавартай байдал болоод Есүсд буюу түүний ажилд үнэнч сүсэг бишрэлтэй байдлаараа бидэнд итгэлийн амьдралаар хэрхэн амьдрахыг заадаг юм. Мөн Христийн төрхийн баяр хөөр ба амар амгаланг бусдад болон манай дэлхийд авчирдаг итгэл бишрэлээс төрсөн Шашны чуулганы энэрэл хайрын үлгэр дууриалал бол Мариа юм. Эцэст нь Мариа байнгын залбирлаараа болон түүний амьдрал, үхэл ба дахин амилалтын нууцад оролцсоноор Христ дэх Шашны нэгдлийн үлгэр дууриал болдог билээ. Сүмийн Эх, Мариа өөрийн залбирлаар үүрд биднийг Тэнгэрбурханд илүү ойр аваачиж, түүний хувиргалт болон цагаатгалын хайрыг хуваалцахад зүрх сэтгэлийг маань нээж, Тэнгэрбурханы үгэнд итгэх бат итгэлийг суулгаж, түүний энэрэл халамж болон бидний төлөө болон манай дэлхийн төлөөх энэрэл нигүүслийн төлөвлөгөөнд найдвартай байхад биднийг урамшуулан зоригжуулах болтугай.